Employment Lawyer sa Tagalog   | Tagalog Employment Lawyer

1. Huwag pumirma sa mismong araw. Maaaring taktika sa negosasyon ang alok na may dagdag na bayad kung pipirma agad. Humingi ng sapat na panahon upang pag-aralan ang dokumento at ipasuri ito sa abogado.

1. Tipunin ang mga papeles. Employment contract, employee handbook, offer letter, pinakahuling payslip, talaan ng bonus at commission, termination letter, at anumang email o message mula sa kompanya.
2. Huwag sumagot habang emosyonal. Maaari ninyong sabihin: “Kailangan ko pong pag-aralan ang dokumento bago ako sumagot.”
3. Alamin ang mga deadline. May takdang panahon para sa wrongful dismissal claim at reklamo sa Employment Standards. Maaaring mabawasan ang inyong mga opsyon kapag natagalan ang pagkilos.

Tingnan din: severance　|　wrongful dismissal

Para sa may work permit, caregiver, at temporary foreign worker

Labag sa batas ang maningil sa inyo ng recruitment fee

Sa Alberta, hindi puwedeng maningil ang isang employment agency sa isang temporary foreign worker para sa recruitment o sa paghahanap ng trabaho. Hindi rin sila puwedeng humingi ng bond o deposito, at hindi puwedeng ibawas ng employer sa sahod ninyo ang binayaran nila sa agency. Kailangan ding lisensyado ang employment agency sa Alberta, saanman sila nag-recruit.

Kung may sumingil sa inyo, maaaring may paraan upang mabawi ang ibinayad. Puwede kayong tumawag sa Temporary Foreign Worker Advisory Office sa 1-877-944-9955, o kumonsulta muna sa amin kung nag-aalala kayo sa epekto nito sa inyong status.

Maaaring mag-alala kayo na mawalan ng trabaho o maapektuhan ang inyong immigration application kapag nagreklamo. Makipag-usap muna nang pribado sa isang abogado bago gumawa ng anumang hakbang.

Saklaw din kayo ng Employment Standards Code

Saklaw din ng Employment Standards Code ng Alberta ang mga temporary foreign worker. Hindi nababawasan dahil sa work permit ang minimum na karapatan sa sahod, overtime pay, general holiday pay, bakasyon, at termination notice.

Humingi ng payo kung kinumpiska ang inyong pasaporte o mga dokumento, pinagbantaan kayo tungkol sa inyong immigration status, hindi binayaran ang overtime, pinagawa ang trabahong wala sa permit, o kinaltasan nang labag sa batas para sa tirahan o pagkain.

Kapag natanggal kayo at employer-specific ang permit

Kapag employer-specific ang inyong work permit, maaaring maapektuhan agad ang kakayahan ninyong magtrabaho pagkatapos mawalan ng trabaho. May magkahiwalay na deadline at proseso ang employment law at immigration. Kailangang pag-isipan ang pagkakasunod-sunod ng mga hakbang at kumilos bago mag-expire ang permit.https://shimlaw.ca/calgary-immigration-lawyers/temporary-residence-in-calgary/

Kung nasa caregiver program kayo o nagpaplanong mag-sponsor ng pamilya, kumonsulta muna bago gumawa ng hakbang na maaaring makaapekto sa inyong trabaho o immigration application.https://shimlaw.ca/calgary-immigration-lawyers/calgary-immigration-caregiver-program/

Hindi ako tinanggal, ngunit malaki ang ipinagbago ng trabaho

Maaaring magkaroon ng constructive dismissal kapag gumawa ang employer ng malaking pagbabago sa mahahalagang kondisyon ng trabaho nang walang pahintulot ng empleyado. Maaari itong ituring na pagtanggal kahit walang pormal na termination letter. Halimbawa:

• Malaking bawas sa sahod, o pag-alis ng bonus o commission na malaking bahagi ng kita ninyo

• Pagbaba ng posisyon, pag-alis ng mahahalagang responsibilidad, o pagbibigay ng napakakaunting gawain

• Malaking pagbabago sa lugar o oras ng trabaho nang walang pahintulot ninyo

• Patuloy na harassment o nakasasamang kapaligiran sa trabaho na hindi inaaksyunan ng employer

Huwag pong mag-resign muna bago magtanong

Mahigpit ang mga legal na kondisyon ng constructive dismissal. Mahalaga ang paraan at oras ng inyong pagtugon. Kung matagal kayong nagpatuloy sa trabaho nang walang pagtutol, maaaring ituring na tinanggap ninyo ang pagbabago. Ang biglaang pag-resign ay maaari namang ituring na kusang pag-alis.

Kumonsulta bago magpasya. Matutulungan kayo ng abogado na suriin kung constructive dismissal ang nangyari at kung paano kayo dapat tumugon.

Sahod, overtime, at bakasyon

Nagtatakda ang Employment Standards Code ng minimum na proteksiyon sa sahod, overtime, at bakasyon.

Kabilang sa mga karaniwang problema ang hindi binabayarang overtime na tinatawag na “boluntaryo,” ang pagbibigay ng titulong “manager” kahit walang tunay na kapangyarihan, at ang pagturing sa isang empleyado bilang independent contractor. Sinusuri ng batas ang tunay na kalagayan ng trabaho at hindi lamang ang nakasulat na titulo.

Diskriminasyon at pang-aapi sa trabaho

Ipinagbabawal ng Alberta Human Rights Act ang diskriminasyon batay sa ilang protektadong dahilan. Ang pinakamalapit sa karanasan ng mga bagong dating at ng komunidad natin ay: lahi, kulay, ancestry, lugar na pinagmulan, paniniwalang relihiyoso, edad, kasarian, kapansanan (pisikal o mental), katayuan sa pag-aasawa, at katayuan ng pamilya.

Kabilang sa mga sitwasyong maaaring kailangang suriin ang hindi pag-promote dahil sa accent o pinagmulan, pagkawala ng posisyon pagkatapos ng maternity leave, hindi pantay na pagtrato dahil sa mga responsibilidad sa pamilya, at patuloy na panlalait na ipinapalagay na biro lamang.

May sariling takdang panahon ang human rights complaint, at magkaibang daan ito sa wrongful dismissal claim. Minsan puwedeng sabay, minsan kailangang pumili. Nakadepende ito sa gusto ninyong makamit: bayad, pagbabalik sa trabaho, o pagkilala at pagwawasto.

Para sa mga may-ari ng negosyo

Tumutulong din kami sa panig ng employer, kasama ang maraming negosyong pag-aari ng mga Pilipino sa Calgary: kainan, grocery, cleaning, trucking, at home care agency.

• Paghahanda ng employment contract at termination clause na sumusunod sa batas at naglilinaw sa posibleng termination entitlements

• Employee handbook, confidentiality, at non-competition clause

• Wastong paraan ng pagtanggal para mabawasan ang panganib ng wrongful dismissal claim

• Pagtugon sa reklamo sa Employment Standards at sa human rights complaint

• Pagsunod sa patakaran sa pagkuha ng dayuhang manggagawa. Tingnan ang employing foreign workers.

Paalala: hindi namin maaaring katawanin ang employer at empleyado sa iisang alitan. Kung nauna nang kumuha sa amin ang kabilang panig, sasabihin namin ito at magre-refer kami sa ibang abogado.

Ang taong makakausap ninyo sa Tagalog

Anthony Ludalvi Vista　Student-at-Law　|　English · Tagalog · Hiligaynon (Ilonggo)

Bago lumipat sa Canada, mahigit dalawang dekada siyang nagpraktis ng batas sa Pilipinas, kasama ang sampung taon bilang Assistant Special Prosecutor sa Office of the Ombudsman, at nagturo rin siya ng criminal law sa Arellano University School of Law. Dahil dito, nauunawaan niya ang dalawang legal na sistema: ang batas sa Alberta at ang batas sa Pilipinas.

Paalala: bilang Student-at-Law, nagtatrabaho siya sa ilalim ng superbisyon ng isang abogado ng Shim Law. Ang inyong kaso ay may nakatalagang abogado, at si Anthony ang makakausap ninyo sa Tagalog.

Tingnan ang buong team　|　Mga review ng kliyente

Mga Madalas Itanong

Binigyan ako ng severance agreement at tatlong araw lang daw ang palugit. Ano ang gagawin ko?

Huwag pumirma dahil lamang sa maikling deadline. Tipunin ang employment contract, termination letter, at payslip, at ipasuri agad sa abogado. Maaaring may karapatan kayo sa halagang mas mataas kaysa sa unang alok.

Walong taon na ako sa kompanya at anim na linggo lang ang binibigay nila. Tama ba iyon?

Anim na linggo ang minimum sa ilalim ng batas. Maliban kung may balidong termination clause ang kontrata ninyo na naglilimita rito, karaniwang mas malaki ang nararapat sa inyo sa ilalim ng common law para sa walong taong serbisyo. Nakadepende ito sa edad, posisyon, at hirap makahanap ng katulad na trabaho, kaya kailangang makita ang mga papeles.

Sinisingil ako ng agency para sa trabaho ko dito. Normal ba iyon?

Hindi po, at labag ito sa batas sa Alberta. Hindi puwedeng maningil ang employment agency sa isang temporary foreign worker para sa recruitment, at hindi rin puwedeng humingi ng bond o deposito. May paraan para mabawi ito. Puwede kayong tumawag sa 1-877-944-9955, o kumonsulta muna sa amin nang pribado kung natatakot kayo sa epekto sa status ninyo.

Natanggal ako at employer-specific ang work permit ko. Alin ang unahin ko?

Kailangang suriin ang employment at immigration issues nang sabay. Maaaring maapektuhan ang kakayahan ninyong magtrabaho, at may deadline din ang inyong employment law claim. Kumonsulta agad at huwag hintaying malapit nang mag-expire ang permit.

Binaba ang sahod ko at inilipat ako sa malayong lugar. Puwede ba akong mag-resign na lang?

Huwag po munang mag-resign. Maaaring constructive dismissal ito, pero mahigpit ang mga kondisyon at ang paraan at oras ng pagtugon ninyo ang magpapasya sa resulta. Ang biglaang pag-resign ay puwedeng ituring na kusang pag-alis. Kumonsulta bago magdesisyon.

Buwanang sahod ako, kaya sabi nila wala akong overtime. Tama ba?

Hindi laging tama. Ang batayan ay ang totoong ginagawa ninyo, hindi ang paraan ng pagbabayad o ang titulo ng posisyon. May mga manager, supervisor, at propesyonal na talagang hindi saklaw, pero hindi puwedeng basta tawagin kayong “manager” para lang makaiwas sa overtime.

Sabi ng kompanya, “independent contractor” daw ako, kaya wala akong karapatan.

Hindi palaging nakabatay sa titulo ang legal na katayuan. Sinusuri kung sino ang kumokontrol sa trabaho, sino ang nagpapasan ng panganib ng kita at pagkalugi, sino ang nagbibigay ng kagamitan, at kung may pagkakataong kumita bilang isang hiwalay na negosyo. Maaaring ituring na empleyado ang isang taong tinawag na independent contractor.

Palagi akong nalalampasan sa promotion dahil sa punto ko at kung saan ako galing.

Ang lugar na pinagmulan, ancestry, at lahi ay protektadong dahilan sa ilalim ng Alberta Human Rights Act. Kung diskriminasyon ba ito ay nakadepende sa tunay na ebidensya: ang aktwal na pamantayan sa promotion, kung sino ang naitaas, at kung may mga naitalang pahayag. May sariling takdang panahon ito, kaya kumonsulta agad.